Специјалната јавна обвинителка Катица Јанева претпладнево даде свечена изјава пред Советот на јавни обвинители, кој синоќа на вонредна седница пред полноќ едногласно ја избра на функцијата, откако ја утврди претходно и собраниската комисија за избори и парламентот.
-Денеска нема да одговарам на новинарски прашања, туку сакам да му се заблагодарам на Советот за изборот, на политичките партии и меѓународниот фактор, како и на сите кои застанаа зад мене. Денеска стоев овде пред Советот, сега и седам сама, но за еден месец ќе ме видите со мојот тим зад мене и тогаш ќе ги преземеме предметите за кои сме надлежни- иајави Јанева по давањето на свечената изјава пред Советот на обвинители.
Обвинителката Јанева побара од новинарите да не и се јавуваат на телефон, бидејќи нема да одговара и да комуницира на тој начин, туку исклучиво на емаил.
Претседателот на Советот на обвинители Петар Аневски и порача на Јанева дека треба да ги оправда очекувањата на сите нив, бидејќи сега таа ќе биде главна во целата работа.
Во Советот на Јавни обвинители член е и постојниот Јавен обвинител Марко Зврлевски.
Според законот кој вчера експресно беше усвоен од Собранието и потпишан од претседателот ѓорѓе Иванов, Катица Јанева сама треба да предложи колку нејзини заменици ќе има, од редот на постојните обвинители, кои нема да можат да издаваат налози за апсење и да потпишуваат обвиненија, туку исклучиво ќе постапуваат во име на специјалната обвинителка.
Во законот и е даден рок на обвинителката од 18 месеци во кое време ќе мора да ги заврши истрагите и да подигне обвиненија за дела кои произлегуваат од прислушуваните разговори, а доколку не го стори тоа, понатаму не ќе може да гони.
Извор: novatv.mk