Пред мене и пред нас стои најчесната мисија од сите, да создадеме општина во која сите граѓани ќе бидат еднакви. Охрид е космополитски град и во тој дух, а и во духот на социјалдемократијата, нашата цел е да работиме на создавање на можности за сите граѓани, рече на прес конференцијата одржана на градскиот плоштад д-р Јован Стојаноски, кандидат за градоначалник на Охрид од редовите на СДСМ придружуван од кандидатите за советници во Советот на општина Охрид од оваа партија и нејзините коалициони партнери.
-Повеќе од дваесет години работам во образованието, и верувајте разбирам што значи грижата за идните поколенија, што значи влогот во подобро образование, подобра иднина за сите. Имам две деца кои сакам да израснат овде, кои сакам да се образоваат овде, да работат овде. Затоа сум тука, но не само за моите, туку и за вашите деца. Имам визија каков Охрид треба да создадеме, но ќе ми треба вашата помош за тоа.
Ќе создадеме отворена и услужна општина за сите. Секој граѓанин ќе може да се обрати до општината и навремено да ја добие својата услуга. Ја враќаме моќта и самостојноста на месните и урбаните заедници кои со зајакнат правен статус ќе помогнат тие максимално да бидат во служба на граѓаните. Во соработка со Владата на Република Македонија обезбедуваме помош за малите и средни претпријатија, а со тоа и нови вработувања и нови можности за младите.
Работиме по план, создаваме инфраструктура за сите. Наша цел е тоа да го постигнеме преку :
Нудење на нови решенија во водоснабдувањето
Санација и доизградба на колекторскиот систем
Изградба на фабрика за отпад
Услови за достоинствена старост
Гасификација на Охрид.
По 15ти октомври создаваме нов Охрид. Носиме живот во Охрид, за сите, порача и вети д-р Стојаноски.
Публицитет.мк