На денешен ден, 19 август, пред 73 години Блаже Конески е избран за прв претседател на Шаховски сојуз на Македонија. По тој повод, а во чест на великанот, но и во чест на денот кога во македонската традиција се слави и Свето Преображение, денеска претпладне во шаховското паркче во Аеродром се одржа негово чествување, со песна, поезија и рецитации.
Пригоден збор кажа уметникот и хуманист Живко Поповски Цветин, шаховскиот велемајстор Димитар Илиевски, уметницата Нада Туреска ги претстави своите уметнички изработки- стилизирани стапови, поезија читаа Мендо Димовски и Валентина Ѓоргиевска Парго, додека велосипедистот и новинар Томислав Башевски откри дека во чест на професорот Конески неодамна возел преку стотина километри.
Она што беше значаен дел од програмата беа пејачките интерпретации на македонски етно песни на Ристана Рина Николова, која во своја музичка импровизација отпеа и песни од Конески, и пред се песната “Ружа”, а на нејзината шаховска табла стара стара 60 години се одиграа реми партии. На таа табла во училиштето во селото Шемшево некогаш шах играле наставниците Ташко Зоровски и Јумни Јунузи.
Уметникот Цветин нацрта цветна азбука со буквите од македонската азбука, подари десетици цртежи и наслика цветна лента со стиховите на Конески, додека неговата цветна штафета што ја наслика Николова наскоро ќе ја однесе меѓу нашите во Канада.
Публицитет.мк
