Во црквата „Св. Богоридица Перивлепта“ во Охрид се одвива втората фаза од конзервацијата на фрескоживописот и интензивно се работи уште од месец април и ќе се работи се додека дозволуваат временските услови.
-Ова не е процес за кој треба да се брза и да се заврши, туку треба да се почитуваат техниките и процесот на работа. Само така долгорочно ќе го продолжиме животот на оваа црква, односно на вредните фрески во неа. Јасно е дека ќе има и трета фаза која ќе остане за догодина. Паралелно со овој зафат се работи и на конзервација и реставрација на манастирскиот конак, како и на камбанаријата. Лани ги изработивме и ги добивме потребните одобренија поминаа јавните набавки и сега се работи и на тој простор. Овие два зафати се финансирани од грантот во висина од 650 000 долари којшто Управата за заштита на културното наследство го доби од амбасадата на САД во Македонија, а градежните активности се финансираат преку Министерството за култура на РМ во рамките на Годишната програма, изјави за Публицитет.мк директорката на охридскиот Завод и Музеј Тања Паскали – Бунташеска.
Света Богородица Перивлепта е една од најстарите и најзначајните цркви во Охрид, изградена и живописана во 14 век. Ктитор на црквата бил византискиот војсководец и намесник Прогон Згур, зет на императорот Андроник Втори – Палеолог. Црквата била подигната во 1295 година. На сите ни е познато дека Св. Климент е заштитник на Охрид … во времето на османлиите бидејки неговата црква „Свети Пантелејмон“ е претворена во џамија, моштите на Св. Климент најпрвин се преместени во „Мал Свети Климент“, за подоцна да бидат пренесени во „Св. Богородица Перивлепта„ која народот, спонтано ја нарекува оваа црква „Свети Климент“. Во 2002 година по реизградбата на „Св. Климентовата Црква“ (Свети Пантелејмон) моштите на светецот се вратени на Плаошник.
Откога Турците ја претвораат Катедралната црква „Света Софија“ во џ0амија, „Св. Богородица Перивлепта“ (Св. Климент) прераснува во соборен храм на Охридската архиепископија.
Во 11 и 12 век „Света Богородица Перивлепта“ (Св. Климент) располага со богата архиепископска библиотека со ракописи на пергамент. Околу црквата имало големи манастирски комплекс со Архиепископска палата која во средината на 19 век изгорела. Зографите Михаил и Ефтихиј се творци на фрескописот во двете цркви. Поради свеќите, фрескоживописот едвај се препознавал. Во 1950 година сликарот и конзерватор Здравко Блажиќ, со помош на специјално направена емулзија од органско потекло, успеа во црквата „Света Богородица Перивлепта да ги открие фреските во полн сјај што во тоа време преставувало вистинска сензација.
Публицитет.мк
