„Симон Трпчески ја носи сета своја харизма на целовечерниот портрет на Фредерик Шопен“.
Вака лондонските медиуми го најавија исклучителниот синоќешен рецитал на македонскиот пијано виртуоз од светски глас, Симон Трпчески, правејќи споредба дури и со рецензијата на „Тајмс“ во која изведбата на дела од Шопен на неговиот компакт-диск од 2007 година беше оценета како вистинско „истражување на душата“.
„Промоторот во Барбикан центарот изрази желба да се претставам со Шопенова вечер. Генерално е голема честа да се добие ваква покана за солистички концерт во оваа сала, во која толку многу пати сум настапувал со Лондонскиот симфониски оркестар, а и во која токму со овој оркестар ќе се вратам во февруари наредната година. За мојот концерт понудив поширок дијапазон од композиторскиот опус на Шопен, негови мазурки, полонези, ноктурна и скерца. Се надевам дека овој концепт ја прикажа разноликоста во неговите генијални творечки вештини и различни музички форми, бидејќи секогаш е голема одговорноста да се изведуваат неговите дела поради нивната деликатност, вкус, стил и интерпретација. Се надевам и дека успеав да допрам до срцата на публиката и да ѝ ги прикажам различните лица на Шопен во овие композиции“, вели Трпчески, кој на стоечките овации на презадоволната публика во „Барбикан“ им возврати со дури 5 изведби на бис.
По Лондон, Трпчески веќе е на пат за Филаделфија, САД, каде што в петок и сабота, како солист на Оркестарот на Филаделфија под диригентската палка на прославениот Џанандреа Нозеда, ќе ја изведе „Рапсодијата на тема од Паганини“ од Сергеј Рахманинов, информира „КултурОп“ со поддршка од Министерството за култура на Република Македонија.
Инаку, од почетокот на новава сезона, македонскиот културен амбасадор ги собра комплиментите за настапите во Романија, Велика Британија, Италија, Чешка, за прв пат Словачка, Холандија, Соединетите Американски Држави, Италија, Германија и Португалија, а прва декемвриска дестинација ќе биде Катовице, Полска на концертот со Симфонискиот оркестар на Полското национално радио.
Извор: mkd.mk
