Почитувани,
Од денес на широкото и разбранувано новинарско небо свои и позајмени содржини ќе објавува новиот веб портал „Публицитет.мк“. Нашето мото е „Поинаков поглед на нештата“.
Големите „откритија“ и ексклузиви ги оставаме за другите. Ние ќе се обидеме да го пренесеме пулсот на обичните луѓе, на познатите и помалку познатите личности кои на свој начин го градат мозаикот што се вика живот.
Политиката ќе ја има на лажиче, како што знае да рече често една наша колешка. Но затоа,ќе сме во постојана потрага по трајната убавина, поианков поглед ќе фрламе кон културата, уметноста,филмот, новините сврзани со здравјето и убавината. На насловната на „Публицитет.мк “ ќе се трудиме често да ги има успешните од сите сфери на животот, за пример на нас останатите.
Наш најчест интерес ќе бидат темите и луѓето од регионот – Охрид и Струга, но и Македонија, Балканот и Светот.
Нашата мала, ама одбрана редакција свесно влезе во ризикот да го бара своето место под сонцето. Не се занесуваме дека од прва ќе бидеме најчитаните и најкоментираните, ама се надеваме дека полека ќе ја освојуваме Вашата наклоност.
За се’ треба време, па и за нашето етаблирање на преширокото Интернет небо.
Од денес посакуваме „Публицитет.мк“ да биде Ваш избор, читајте ги и другите, сетете се и на нас.
Ви благодариме на довербата
Милчо Јованоски,
Главен и одговорен уредник на „Публицитет. мк“
