Новинарката Валентина Неловска цели десет сезони со многу љубов и посветеност ја уредува и води емисијата „Печат“ на регионалната ТВМ од Охрид.
Во најавата за нејзината емисија на Интернет страницата на ТВМ стои: – Авторот и уредник, Валентина Неловска ги дочекува луѓето кои оставиле белег со своето живеење. Луѓето кои ги бележат и чуваат настаните од заборав.
Темите се најразлични, од минатото па се до секојдневието.
Тоа беше директен повод да разговараме со неа за тоа како течат снимањата, беше ли свесна на стартот дека ќе дотурка толку далеку со емисијата, која сега слободно можеме да ја наречеме култна ,барем за овие наши простори. „Печат“ всушност е потрага по минатото и животот во него, иако, како ТВ формат во неколку наврати се менуваше нејзиниот начин на презентација.
-Драго ми е што ме препознаваат по оваа емисија. Се пронајдов себеси и мојот сензибилитет и покрај напорното темпо со кое работам, паралелно во информативната редакција на ТВМ и на оваа телевизиска емисија која морам да признам бара концентрација, енергија, потрага по животни приказни и копање по податоци, вели во интервјуто за „Публицитет.мк“ .
Во него Неловска ни зборуваше за себе и контактите со нејзините соговорници, за темите кои наскоро ќе се најдат во „Печат“ како и за оние емисии кoи останале во архивата, ама оставиле трага пред се’ кај гледачите.
На прашањето колку емисии се зад неа?, таа со насмевка ни рече дека ги броела до 150 а потоа престанала. Валентина ни рече дека го открива минатото и го става во видео трезорите на телевизијата во која работи, но дека повеќе од се’ го сака мигот, долгите прошетки крај езерото и градот во целина.
М.Јованоски, Публицитет.мк