Пред Влада почнаа да пристигнуваат претставници на невладината организација „АЈДЕ“ и други граѓани кои повикаа на масовен протест против „самоволието и партиската директива на Уставниот суд“, кој сака да овозможи амнестија на педофилија и изборен криминал.
![](https://publicitet.mk/wp-content/uploads/2016/03/tocka.com_.mk_images_content_sodrzina_01-protesti-pred-vlada-a1on.jpg)
Граѓаните кои се собраа пред Влада ќе продолжат со марш да се движат кон Собранието, а потоа и пред Уставниот суд каде што сакаат да го искажат својот протест против самоволието на истиот, каде што уставните судии утре ќе одлучуваат за уставноста на законот за помилување.
Имено, утре на затворена седница Уставниот суд ќе одлучува за Решението што со мнозинство од пет уставни судии го донесе на 24 февруари годинава: да поведе постапка за оценување на уставноста на Законот за изменување и дополнување на Законот за помилување.
![](https://publicitet.mk/wp-content/uploads/2016/03/tocka.com_.mk_images_content_sodrzina_02-protesti-pred-vlada-a1on.jpg)
На седницата ќе се расправа и ќе се гласа за оспорување на измените на Законот за помилување донесени во 2009 година, со што се отвора можност Судот да ги зголеми ингеренциите на Претседателот на државата, со кои тој ќе може да помилува лица осудени за изборен криминал, но и за други тешки кривични дела како силување и педофилија.
„Уставниот суд е пред важна одлука: Ако укине одредби од Законот за помилување и самиот ќе се ‘укине’ како чувар на Уставот“, порачаа граѓански активисти пред вечерашниот голем протестен марш.
![](https://publicitet.mk/wp-content/uploads/2016/03/tocka.com_.mk_images_content_sodrzina_03-protesti-pred-vlada-a1on.jpg)
И, додека претставниците на невладината организација „АЈДЕ“ и други граѓани и претставници на други невладини организации, како и партиите СДСМ, НСДП, Обединети за Македонија и други вечерва ќе го искажат својот протест пред седиштето на Уставниот суд, кој најавија дека ќе трае цела ноќ и ќе продолжи утре, на истото место се одржува и контрапротест организиран од партијата „Гром“ предводен од градоначалникот на Карпош, Стевчо Јакимовски.
Граѓаните предводени од „Гром“ велат дека се тука за да го чуваат Уставниот суд и сметаат дека „никој нема право да врши притисок на институциите и да му забранува на Уставниот суд да донесе одлука, кој треба да си ја работи својата работа“.
![](https://publicitet.mk/wp-content/uploads/2016/03/tocka.com_.mk_images_content_sodrzina_04-protesti-pred-vlada-a1on.jpg)
И двата протести, како што напоменавме, се случуваат еден ден пред Уставниот суд да ја донесе конечната одлука за правото на Претседателот на државата да може да помилува осуденици за повеќе тешки кривични дела меѓу кои и изборни нерегуларности, силување и педофилија.
www.tocka.com.mk