Во организација на Издавачката куќа Светулка, на 24 јули 2026 година (петок), со почеток во 19:30 часот, во The Harbour Club во Охрид ќе се одржи промоцијата на романот „Само уште еден скок“.
За книгата ќе зборуваат Ана Јовковска и Весна Мојсова-Чепишевска, кои ќе се осврнат на книжевните, етичките и општествените теми што ги отвора романот.
Раскажан од перспектива на кучето Тото, „Само уште еден скок“ е роман што на необичен и искрен начин говори за човекот и неговиот однос кон светот. Низ приказната за едно куче се испреплетуваат теми за љубовта, припадноста, довербата, загубата и безусловната верност, но и за зачувувањето на природата, исчезнувањето на историското наследство, урбаната агресија и одговорноста што ја имаме кон светот што им го оставаме на идните генерации.
Романот испраќа силна порака за емпатијата и сочувството – не само кон животните, туку и кон луѓето и кон сè што нè опкружува. Истовремено, преку топла и емотивна нарација, потсетува дека најголемите животни вистини честопати се кријат во навидум обичните мигови.
Промоцијата е отворена за јавноста, а организаторите ги покануваат сите љубители на книжевноста да бидат дел од ова книжевно случување во Охрид.Промоција на романот „Само уште еден скок“
Публицитет.мк
