Љубителите на театарската уметност во рамките на фестивалот „Охридско лето“ вечерва ќе имаат можност да ја проследат претставата „Лет над кукавичкото гнездо“ според романот на Кен Кесеј во режија на Жарко Томиќ, а во изведба на Драмскиот театар од Белград. За претставата владее голем интерес за што потврда е тоа што билетите се распродадени уште пред неколку денови …
Претставата „Лет над кукавичкото гнездо“ е драмски текст на Дејл Васерман, работен според романот на Кен Кесеј, а ја игра позната актерска екипа на Драмскиот театар од Белград, во режија на Жарко Томиќ. Како што рече актерот Драган Бјелогрлиќ оваа претстава во изминатите 20-тина години е одиграна 250 пати и според него таа е ода на слободата и секогаш е актуелна кога има скратување на слободите во општеството.
„Мојот живот е дел од процесот којшто се случува на сцената, бидејќи главниот лик го толкувам уште од првата претстава. За оваа претстава повеќе не можам да зборувам како за уметничко дело, туку како за дел од мојот живот“, изјави актерот Драган Бјелогрлиќ.
„Мислам дека оваа претстава е хит над хитовите во Белград. Многу добра претстава која публиката многу ја сака, а во која игра една блескава актерска екипа“, додаде актерот Милутин Мима Караџиќ.
За актерите претставата е нешто повеќе од театарот, повеќе и од животот.
„Оваа претстава за сите нас е многу значајна, бидејќи е осмислена да ја врати човечноста кај луѓето, емпатијата и да не потсети на некои работи, поради што постои уметноста и за што треба да служи“, нагласи Милица Зариќ- актерка.
„Ова е таков тип на претстава што тешко можете да се одвоите од неа, затоа што атмосферата е фантастична. Екипата е добра, иако е прилично изменета, бидејќи со нас веќе не се повеќе актери од основната постава“, додаде Слободан Нинковиќ- актер.
Претставата е распродадена уште пред четири дена, а љубителите на театарот ќе ја проследат вечерва во 21 часот во Центарот за култура „Григор Прличев“ во Охрид.
Сашо Нелоски, МРТ
Публицитет.мк
