После 8 години каналот Студенчишта е исполнет со рибари и пак го добива стариот сјај кога беше рај за рекреативни риболовци од цела Македонија.
Во тоа време дневно на каналот престојуваа и се рекреираа над 500 рекреативни риболовци. Сега можеме да забележиме рекреативни риболовци само во ноќните часови. Крапот влегува во каналот пред стемнување и излегува пред разденување.
Една од причините што крапот не се задржува е секојдневното поставување на мрежи од страна на концесионерот за стопански риболов на Охридско Езеро пред влезот на каналот и во трските на самиот влез од каналот.
Во тек е тоталната забрана за лов на пастрмка и белвица но концесионерот продолжува да фрла секојдневно мрежи за крап и клен и нормално ако улови некоја пастрмка ќе ја „врати“ во езерото.
Каналот Студенчишта како најголемиот зимовник и мрестилиште за повеќе видови риба опстојувал со милиони години ние го уништивме за неколку години со пескарење на бродови, преголема концетрација на пловни објекти и влевање на отпадни води од објекти кои егзистираат покрај каналот.
На дното од каналот нема никаква вегетација (флора) и наликува на корито. Рекреативните риболовци со години бараат од надлежните да се ископа и продлабочи и каналот да биде риболовна атракција кој би привлекувал туристи од цела Македонија.
Температурата на водата во каналот е константа поради Билјанини Извори и е едно од ретките места на Балканот каде може да се ловат повеќе видови на риба од средината на октомври до крајот на април, идеално место за развивање на риболовен туризам.
Спортско рекреативните риболовци се против секаква урбанизација на брегот на каналот а особено против најавата за изградба на марина која трајно ќе го уништи овој најголем зимовник и мрестилиште за риба стар повеќе од милион години.
Претседател на Здружение на рекреативни риболовци „Свети Апостол Петар“ од Охрид
Објавените текстови во рубриката АРГУМЕНТИ ЗА … на „Публицитет.мк “ се лични ставови на авторите, а не се ставови на редакцијата.
„Публицитет.мк“ не сноси одговорност за изнесното во нив.
