Награди на 23. Фестивал на европски филм во Палиќ

Синоќа во Палиќ со свеченото доделување на наградите на најдобрите , заврши 23 . фестивал на европски филм кој започна на 16 .јули.По доделувањето на наградите на завршната вечер беше прикажан финскиот филм „Најдобриот ден во животот на Оли Маки“.

Оваа година во главната натпреварувачка програма учествуваа 13 филмови од кои 12 беа во трката по награди.Фестивалското жири за главната натпреварувачка програма работеше во состав: Јешим Устаоглу (Турција), Рина Шилдос (Естонија), Аисте Диржуите (Литванија), Михаела Кезеле (Германија) и Стефан Арсенијевић (Србија).

Тие едногласно одлучија наградата „ Златна кула“ за најдобар филм да му ја доделат на филмот „ Тони Ердман“ на режисерката Марен Аде, филм кој говори за замрсените односи меѓу таткото и ќерката прикажан низ хумор.Тоа е всушност приказна за односите татко и ќерка во овој современ отуѓен свет кој е во постојана трка по успех.

Филмот, да се потсетиме ,беше прикажан во званичната конкуренција на годинешниот Берлински филмски фестивал.

Наградата за најдобра режија „ Палиќка кула“ му припадна на познатиот романски режисер Кристијан Мунѓију за неговиот филм „ Матура“. Мунѓију неколкупати досега бил гостин на овој фестивал со филмовите; „ 4 месеци,3 недели и 2 дена“ и „ Зад ридот“.

Жирито во своето образложение за наградата ќе напише дека режисерот покажува голем талент во создавањето на перфектен портрет на дезинтегрираното и нефункционалното општество со помош на непогрешливо убедлива глума на актерите.Мунѓиу беше гостин на фестивалот кој во средба со новинарите говорел за својата естетика и сваќање на филмот но и за генерацијата на синеасти од новиот романски бран кој се појави по 1989 година.

Оваа година меѓународното жири одлучи да додели и две Специјални признанија. Едното му припадна на филмот „ Дневникот на машиновозачот“ на режисерот Милош Радовиќ , кој да се потсетиме беше прогласен за најдобар филм според изборот на гледачите на годинешниот филмски фестивал во Москва. Жирито во својата одлука ќе образложи дека филмот преставува изненадувачка црна комедија со урнебесен актерски ансамбл и единствена визуелна интенција која публиката не ја остава рамнодушна.

Второто специјално признание жирито одлучи да му го додели на полско – шведскиот филм „ Љубовта е горка“ на режисерот Томаш Василевски.Филмот користејќи фрагменти од животот на четири жени гради силна приказна за осаменоста и копнежот.

Меѓународното жири на критиката од натпреварувачката програма „ Паралели и судири“, предводено од српската филмска критичарка од Виена, Марина Рихтер, за најдобар филм го прогласи унгарското остварување „ Патека од лилјани“ на режисерот Бенедек Флигауф.Во образложението на жирито за оваа награда стои: „ Ова филмско доживување не одведе на места за кои не бевме подготвени, а потоа не врати назад“.

Ова жири специјална награфа му додели на словачкиот филм „ Ева Нова“ во режија на Марко Шкоп.Фимот преставува емотивна приказна која говори за одлуките, врските и вината кои се појавуваат како животни пресвртници.

За прв пат оваа година е воведена програмата „ Очи во очи“ која беше наменета за помладите љубители на филмот чија програма ја оценуваше стручно жири предводено од Лара Мајкиќ. Според жирито за најдобар филм во оваа категорија е прогладсен филмот „ Лекција“ во режија на Кристина Грозева и Петр Влчанов кој преставува бугарско –грчка копродукција.

Инаку, фестивалот започна изминатата сабота ( 16. Јули.) на летната сцена во Палиќ со врачувањето на наградите „ Александар Лифка“ на режисерите Слободан Шијан и Улрих Сајдл од Австрија, за придонес во европскиот филм. По врачувањето на наградите тие заедно го прогласија фестивалот за отворен.На отворањето на фестивалот беше прикажан документарниот филм „ Пожар на море“ на режисерот Ѓанфранко Рози, годинешниот добитник на „ Златната мечка“ на годинешниот Берлински филмски фестивал.