За една недела, неофицијалните информации говорат дека ДИК добила повеќе од 2.000 пријави за грешки во електронскиот избирачки список. Некаде имаше објави дека се пристигнати и многу повеќе пријави.
Конкретно, најчесто известувањата што ги примиле ДИК се однесувале на лицата што не се државјани на РМ, а се вкучени во избирачкиот список, за лицата што не поседуваат важечки личен документ, потоа за оние што немаат наполнето 18 години, лицата што се на привремена работа или престој во странство, со последно живеалиште на дадена адреса, лица што немаат живеалишта на територијата на земјава, починати лица, на лицата што им е одзедена деловната способност…
Проблемот е што македонските гласачи кои сакаат да пријават грешка во податоците или „фантоми“ на нивните адреси се влезени во лавиринт, а надлежните институции не знаат да одговорат што понатаму ќе се случува со овие пријави, и кој точно ќе постапува со нив.
Истовремено, од ДИК доаѓаат различни информации – едни велат дека до 17 април, кога е рокот, на увид ќе се стави прочистениот избирачки список, а други велат дека нема да се стигне по овој наплив од пријави на граѓаните. И оваа информација е во зависност од тоа од кого доаѓа брифингот – од членови на ДИК од опозицијата или од власта.