Проекцијата на филмот за двајцата словенски апостоли, светите Кирил и Методиј во Трпејца, во рамките на културно – забавната манифестација „На зајдисонце“ беше примена со воодушевување и овации од туристите и мештаните.
Историскиот филм за светите браќа Кирил и Методиј е дело на чешкиот режисер Петр Николаев, а во продукција на Виктор Криштоф. Филмот за светите браќа е снимен по повод 1150-годишнината од почетокот на мисијата на Кирил и Методиј во Моравија и се бави со прикажување на нивните дела во ширењето на словенската писменост.
Македонската премиера на филмот за светите Кирил и Методиј, беше лани на фестивалската програма на „Охридско лето“. Заслугата за тоа ја имаат нашите иселеници од Охрид Александар Глигуроски и Јован Буџакоски кои веќе 15 години се успешни бизнисмени во Прага, Чешка.
На барање на организаторот на манифестацијата во Трпејца чешкиот продуцент прифати филмот да биде прикажан и во оваа крајезерска населба која е лоцирана меѓу Охрид и Свети Наум, каде учениците на Кирил и Методиј, Климент и Наум ја продолжиле нивната просветителска мисија.
Александар и Јован беа позитивно изненадени од приемот на филмот и најавија дека културниот мост Трпејца – Прага ќе функционира и идното лето.
Претходно организаторот на манифестацијата Здружението „За Трпејца со љубов“ на повеќемина заслужни помагатели и спонзори им врачи благодарници и скромни подароци.
Четвртото издание „На зајдисонце“ започна на 20 јули и во текот деветте дена се одржаа бројни настани кои го привлекоа вниманието на туристите и мештаните.
Публицитет.мк
